Mari barpantun ( Karya asli dihasilkan tepat pada 31 Disember 2008 (selamat manyambut tahun baru) )

Pajah api boleh diaga
Turun ka sungai ditungap buaya
Angin ribut dapat disangga
Inikan pula hati marana

Anak damit duduknya supan
Somboi-somboi ranik tangkainya
Aying mailir dapat dipampan
Hati yang rindu apa ubatnya

Duduk batarak di dalam hutan
Anak basinting di atas titi
Luka labang-labang dapat dipantan
Bagaimana pula luka di hati

Ada uras masuk di mata
Kajam-kisap si kalimpanan
Jika sungguh bagai dikata
Hantarkan gambang jadi hantaran

Batangkumus kain palikat
Duduk manumbir di ujung jungkar
Ada ati mau mamikat
Ibarat lampuyang inda barakar

Carmin aplor marakkan api
Andayang pinang buat mainan
Sudahtah cangkir kurus malidi
Ruhong-ruhong manangis ujung pantaran

Sungkai puasa mangual baduk
Manunggu pangantin bargual canang
Kapala badagung batis balingkuk
Taguring tajalumpuk kalau ditandang

Balingkarung makan kalupis
Makan kalupis basapak gulaian
Jangan diharap malintangnya kumis
Bajumpa kalindahau katungkal-tungkalan

Burung kanawai batapok di ranting
Batang kandis dibuat unun
Anak orang jika disunting
Kana sadia manjadi ulun

Kapala disintak ubat mujarab
Karijat-karijat badan manahan
Oranag bujang apa diharap
Jika kaya barangan-angan

Kapanasan barkiap-kiap
Kiap dibuat biut sabalah
Sulap dibuat bilakan siap
Malar barcarita salarah-larah

Luka di batis manganyat-nganyat
Sintakbabut pamarang di tangkin
Jika barangan sapanjang hayat
Sampai kiamat pun jatuh miskin

Siang –malam manjamur kubal
Nasi bangas dibuat sagun
Bagaimana indakan babal
Amun balajar indatah tagun

Sabarakas ranting kandis dahan
Luka badarah suar-suar
Dari abak-abak hati manahan
Aku sanggup manunggu di luar

Tahajud selagi ada peluang dan ruang

Kesihatan yang baik satu anugerah tertinggi dari Allah. Solat tahajud adalah sesuatu yang mesti dilakukan. Selain semangat positif dan motivasi diri sendiri perlu supaya kita gembira. Selalu reda dengan apa yang ada. Ketenangan hati perlu diberi keutamaan selain rehat yang cukup dan pemakanan seimbang.

Seloka nasihat:

Paus-paus asapnya sigup
Sanak taulan masti dijarah
Jangan mangaus selagi hidup
Kepada Allah kita barsarah

Pantun Tiara Beach Resort

Papat kuku di tunjung ari
Anak damit nampak suginnya
Manunggu si dayang barmalam-bahari
Inda nampak bayang-bayangnya

Takulipit di tinda mambubut pimpikau
Gatal badan bagaligata
Anak damait barsigup tambakau
Inda manis dipandang mata

Carik baju tarkait lalau
Anak bayi tupap munungnya
Guring-limpang tangan kasilahau
Sakit dan bisa inda tarkira

Kulimambang tarbang malayang
Ikongnya putus tarkipat-kipat
Rindu dandam mabuk kapayang
Tiada apa yang boleh kudapat

Turun ka tanjung mangambur manyung
Karung guni di hujung tabuk
Pipi tarsorong hidung tak mancung
Anak orang jangan disubuk

Mamarun uras sabut piasau
Dapat barudu bular matanya
Sintak-babut si mata pisau
Malihat bubu panuh isinya

Patu manyudu di palacahan
Alun-alun tabal batunya
Mangajar anak parlahan-lahan
Kalam kabut tiada gunanya

Nandung tarbang inda barsayap
Hinggap di anjung rumah Pak Mamat
Panas badan walau barkiap
Patanda dunia mau kiamat

Karya asli dicipta ketika menghantar anaknda berkursus di Tiara Beach Resort, Port Dickson Negeri Sembilan (19 hingga 24 Januari 2009). Tahniah buah hatiku kerana telah mewarisi kerjaya sebagai pendidik.