Pantun Anak Damit (Karya asli yang dihasilkan ketika mengajar kerani PKG membuat Blog Bahagian Teknologi Pendidikan (Sabah), pada 15-18/12/2008)

Buah santul di kupas-kupas
Kulit digosok daun ampalas
Biabas mangkal kubuat upas
Handak malastik burung taripas

Baligkasa si balingkarung
Gesek biola si tali karung
Salendang taruk babaju kurung
Baru padan kainnya gadong

Tarbang mangawan burung kalagiau
Pangalaut turun bakarang
Anak orang jangan diingau
Mangkali udah tunangan orang

Maunjar tibadak hari dah siang
Tibadak nangka tabal isinya
Sidak-sidak nangis di tiang
Kana pijara oleh bapanya

Sungai bangat batambu akar
Mangail kali putuslah tangsi
Mangamuk siman ka ujung jungkar
Payah dipujuk inda mangasi

Siman tapai karana olah
Siman kuih kurang parancah
Sudah basar jangan baolah
Ibarat ambuyat inda bacacah

Mambuat lastik kayu bapanga
Upas dibuat sibuah pinang
Kalau si dayang balum bapunya
Ada arapan masuk maminang

Nikmat Allah...... lakaran tahun 2010

Tiup api barumbun api
Atap rumbia sudahpun miris
Kulihat si Lamah tabamnya pipi
Amun takidum muanya manis

Usia yang panjang adalah nikmat yang tidak ternilai. Kerananya kita terus dibagi peluang untuk memperbanyakkan ibadat kepada Allah, merasai kemanisan hidup, berkongsi kebahagiaan dan merencanakan masa depan serta mencurah pengalaman berharga kepada generasi pewaris.

Firman Allah, "Dan bagi tiap-tiap umat ada tempoh yang sudah ditetapkan, dan apabila tamat tempohnya, tidak dapat dikemudiankan walau sesaat pun dan tidak dapat pula meareka didahulukan." Surat Al-Aaraf, ayat 34.

Hisap sigup tambakau Cina,
Asap kaluar barbuga-bunga,
Jika auda alum barpunya,
Unjarlah jodoh salagi ada.

Pantun pada 22 Disember 2008

Anak gayal pincur belusir
Malihat nenek tangannya pingkul
Rambut buntak apa disisir
Kapala lasak hampir ka gondol

Malam malam tidur badudun
Orang didudun ajainya licin
Anak orang jangan dipaibun
Labih baibun dimintanya cincin

Karbau barlumpur di dalam lupak
Buah piasau ampang isinya
Sudah tua giginya upak
Jangantah lagi handak bargaya

Pokok pulai batangnya ampul
Buah bambangan banyak sagutnya
Duduk di langgar tarsanyum simpul
Sudah tantu ada maksudnya

Aying sapang mujarab diminum
Pangalaut sasat bakarang
Ka tampat orang jangantah umum
Cakah-cakah disukai orang

Singut-singut tanda salesma
Kambang kicup idung banapas
Jika batunang jangantah lama
Tarlampau batah manjadi bangas

Labu gayal inda barbuah
Waima barbuah tawar isinya
Luan tarkajut hilanglah ruah
Nyaris tarbabut nyawa diubunnya

Mangambura karbau di padang
Karbau digiring masuk ka paun
Kubal ambulung apa dihidang
Kalau dihidang kanyang satahun

Lauk basung jangan diratah
Takut tarmakan banyak biarnya
Kalau jambatan sudahlah patah
Inda dapat manyabarang ka sana

Buah santul jarang bargiok
Kapayang tinggi pucuknya
Jika mangalai tarlampau siok
Lupa dunia buruk padahnya

Lipat kain tapas di kaban
Luka bardarah susahkan pantan
Ambacang mantah jangan diumban
Sudah basar barabis tah makan

Sangkabok jangan disubuk
Jika disubuk bisa sangatnya
Pandekar jangan dibubuk
Jika dibubuk nahas jadinya

Kain palikat di ujung tampisung
Sasaban dibuat batang kulimpapa
Hidup di dunia jangatah murung
Sasal kamudian inda barguna

Sungai sunyi batambuakar
Padang si Bedah kaman berduri
Jangan hanya bartanya kabar
Labih baik datang sandiri

Pantun 24 Disember 2008( Karya asli dihasilkan ketika melayari lamanweb MARA.(Tahniah anak sulungku kerna telah ditawarkan sebagai Guru MARA))

Air sapang rasanya bahal
Bakai-bakai manyabarang sungai
Sudah tua balum barakal
Macam anak damait mangalai-ngalai

Tunu andayang sampai marutung
Kalindahau mangumpil barang
Sudahlah nasib inda baruntung
Badan marana dihina orang

Ujan labat ayingnya bangat
Saluruh badan habis marungus
Labu kundur sadap dipangat
Labih sadap ubi barabus

Manjijak padi karbau babalar
Tapih tarlapas kainnya longgar
Orang pintar pantang bakalakar
Jika bakalakar matanya bular


Umpan katupang disambar udang
Tali ambur dihulur ka sungai
Musim puasa jangan tah maradang
Tangah hari sudah tah sungkai

Anak damit balajar marungau
Pangantin mamakai sarimpak
Inda paduli waima dilagau
Puar-pura inda nampak

Batang bamban dibuat kandul
Taruh calapa di dalam saging
Karbau lampuh disangka mandul
Tahu-tahu banyak lah daging

Orang karit tundunnya luak
Mamulihkan barang takut bajaguk
Malihat parangainya aku pun muak
Ikong kuyuk lagikan bengkok

Nasi tambul barisi candas
Apit-apit dimakan agas
Kalau makan jangantah garagas
Amun kabangkalan mambari malas