Tarah pasagi manjadi tatal
Polis ranik satu palatun
Batangkumus tidur bakumpal
Inda sadar anak bajuntun
Batang lalau buatkan tanggar
Tanggar dibawa dalam tabasan
Guring limping ke ujung jungkar
Nasib baik inda kapisanSaluar sandat cangkik di ujung
Orang sakalur takajar-kajar
Anak saluang putut dimunung
Tasalah makan giuk ambatar
Pasang ugan di tangah malam
Arang di tambak sudah manimbun
Apa diingau sakit dan damam
Bisanya sampai ke ubun-ubun
Igal-igal mulih ke sulap
Sulap palapah daun piasau
Hidup jangan ucap-baucap
Waima buntak maupun jagau
Baju siapa pacah talur
Lucut tapih tangannya pingkul
Amun sudah bisul badanur
Bapa mama jangan diingul
Dahi lasak rambut bugal
Anak tabarus tatawa malakak
Makan biluluk mambungkar dugal
Muntah tika tabulahak-bulahak
Pukat-pukat apa dipupuh
Panangalan tarbang di langit
Jangan disakat orang yang lampuh
Nanti disumbat takuyung ladit
Bakuranyaman kutu di rambut
Manarais inda tartahan
Malagau bomoh untuk baurut
Parut kanyang kabungkayanganTangah hari mua ditapus
Dangan
malagau inda taparikah
Pusat tabuncal punggung pun timpus
Saluar sandat lanjar sabalah
Kabur mata karana utik
Tangan amai baik digilir
Kalagi gali dikalakitik
Rasa tabuncal mata babantir
Tinggi sungguh si dahan santul
Saluar basahan dikirah-kirah
Ampul kapok boleh dipupul
Barat tuala
boleh diparah
Anak basing apa dikipak
Labih baik mamburu sangkabuk
Orang tua giginya upak
Diam-diam jangan manyibuk
Ekong putut ekong taripas
Panjang lagi ekongnya angsa
Bahasa Berunai sanang dikupas
Jika diamal sapanjang masa
Anak saluang batinting-tinting
Kurising-kurising dalam pasu
Babalak tangan kain disingsing
Mau manabang ranting tamasu
Tanah lihit diuntal-untal
Mari diuntal dibuat upas
Apa untungnya mamaluk bantal
Idup-idup boleh ku ampas
Anak matingal malarak ambur
Manyamal ditagur baru tah supan
Hidup di dunia jangan takabur
Ibarat aying inda bapampan
Pagar tumbang jangan diambit
Guramai nangka dibuat sambal
Apa diingau tindamu damit
Jangan saja otakmu babal
Anak patu tatingak-tingak
Sintak rambut ubat sanudung
Anak bangsa jangan dilumak
Ibarat sapi
inda baindung
Dinihari marampak jala
Kain naham di bawah tambak
Dangsanak jauh janagan disambarana
Nanti gagau gundah gulana
Sorong jumpung dari buritan
Tangah hari tutuk duduk maragus
Apa guna harta barkuyan
Amun matingal susah diurus
Kulimpapatan tarbang ka ulu
Bungkus salingsing di daun simpur
Apa diikut orang daulu
Hidup bakarang basalam-salur
Batang kaladi anit-anit
Mari dianit buat gulaian
Taguring badasur kulit takulanit
Suak-suak darah bakaluaran
Maradak ular dangan rangas
Urak lampit satampik-satampik
Adik jajal lagi pamalas
Kurapak balingkuk inda balapik
Tabalurut tangan di tiang
Si dayang damit inda taranah
Matahari tinggi hari dah siang
Ibarat taugih sudah bakacambah
Piantung talantung-lantung
Masin paradu tagawah-gawah
Inda sadar nasib dan untung
Lakat lagi bagagut-babantah
Lasung pacah apa diusai
Uwit pasagi buat patungut
Kalagi tabal bauk dan misai
Luak tundun tanda kadukut
Saluar mumut dibuat sahal
Jumpong singit hampir kan karam
Biartah barian harganya mahal
Asal taranah siang dan malam
Anak lami takial-kial
Ampai-ampai di dalam langgar
Mulut kuridak rambutnya ikal
Dalam rambut ada pusar-pusar
Pirik lada tanganku sangal
Kajam kisap mata tapalak
Talinga runcing rambutnya bugal
Inda kana akun jadi dangsanak
Tamparik sambung manyambung
Takulanit jari malasit tungau
Salagi damit jangatah ambung
Sama juga lampuh dan jagau
Ampap lauk dalam balanga
Pajah api tiada bararang
Salagi damit jangan bacula
Sangal sudah babu malarang
Tumbir-tumbir si tahi lalat
Simban-simpan lauk dikail
Hidup di dunia jangan tah galat
Ikut patua bapa si Mail
Mangarai padi di tikar pandan
Gubang miris penuh balaing
Waima jarih menjaga badan
Badan tagap babalah siring
Anak damit jalan bajuntun
Kalakati barbadan jangkang
Anak jajal jangan disusun
Asal saja pandai manjarang
Main gelungsur ratai piasau
Gugur tahabap di siring tabuk
Dangsanak di rantau apa diingau
Kalau pun ingau ditapuk-tapuk
Sungai sungi banyak galugut
Rambut ikal banyak karuat
Silap lama jangan diagut
Silap baru jangan dibuat
Ikung suit takipat-kipat
Buah durian basapar-sapar
Ikung matanya takijat-kijat
Malihat sungai batambuakar
Takuyung ladit inda barasa
Jadi santapan Zaman kuratu
Idup di dunia jangan tamaha
Waima ku hulu
hilir kita beramu
Tahabab tajulumpuk atas karasik
Tadasur taguring di tanah licak
Kalau talimpang bajunya carik
Amun tajungkang di bawah balatak
Anak tuyu bajunya tatas
Talur cacakan di ari-ari
Piasau tua banyak ampuras
Piasau muda jangan ditagari
Apa ditampik si
karung padi
Bubus ujungnya si karung guni
Apa disungkit orang pangagahi
Alang-alang manyungkit biarlah sandi
Kuyuk batian jangan diacut
Acut dangan galagar di surambi
Saluar pilarut jangan tabalurut
Amun tabalurut membari galiati
Lagur lakap dinding dilantak
Galigata gatal di badan
Mamasak dadih buratak-buratak
Duduk tapunduk atas pantaran
Bamban dibuat si apit-apit
Orang kawin bakalambigi
Tidur malam jangan barhimpit
Nanti dipalu dengan gagawi
Bajampurut buah kandis
Batang putat dibalah-balah
Si Dayang tunduk bartambah manis
Rupanya mata juling sabalah
Pilarut talungsur di
runggut kuyuk
Taburangga sampai ka
kating
Orang pintar jangan
dibuyuk
Ibarat putat dilanggar
basing
Saluar pilarut tatas di siring
Tatas dimakan samut kulirangga
Kain kasa jangan disingsing
Amun disingsing pitutan mata
Mangambura karbau di padang
Tarlapas pakul patah guyudan
Jangan mangaku pendekar tarbilang
Nanti marana tubuh dan badan
Pohon rokam inda berbaja
Sahan utau di atas dada
Salagi damit pijarakan saja
Sasudah basar jadi jalama
Tabun-tabun mamarun uras
Uras diparun dipapat-papat
Amun baibun jangan tah muras
Tabuk di dapur inda bakabat
Kaluar ke pekan seawal sambat
Mambali makanan si kalingkasa
Anak damit wajib di ambat
Udah basar kurang bacula
Paradah-paradah ditarah-tarah
Diparun atas pohon bangkita
Kalagi bida samasa marah
Ibarat kacuping bapampan mata
Dangsanak jangan tabarus
Ibarat larak papan barunti
Barubut kaskol nyaman dirabus
Basapak dangan asam kalumbi
Walau ampul si anak jarih
Makan nangkutut di dalam siut
Amun bakarih barisi marih
Amun pamalas manakul tuhut
Batumpilakan minyak basupa
Minyak diurap atas ragian
Tajur-tajur aing liurnya
Malihat ambuyat barcacah bambangan
Ambutit adik ambatar
Andat-andat di ujung tiang
Apa ditunggu aying kan limpar
Esok diantar ke dalam liang
Dangsanak bakalimangau
Kudut sumpak dipisuk-pisuk
Anak matingal jangan dilagau
Inda mangalinga sampai ke esok
Ubat sadu inda salulu
Duri rukam ubatnya pilai
Kurang sadap lauk batunu
Sadap lagi bidai-bidai basalai
Apa disahan padi samanduh
Balingkatak damit munongnya
Kalau sudah jadinya jodoh
Antar usin buat balanja
Al kisah ..... dari 2 hingga 6 Mac 2012, saya dan isteri ke Kuala Lumpur untuk menghantar anak bongsu ke UiTM Shah Alam. Sebelum bertolak sempat membeli kuih cincin, amplang dan udang basah untuk dijadikan buah tangan. Penerbangan dengan MAS berjalan lancar. Naik bas dari KLIA ke KL Central. Perjalanan diteruskan dengan LRT ke perhentian Masjid Jamek (Hotel Citin). Petang sempat membeli-belah di sekitarnya, putu mayam tidak ketinggalan. Malangnya langkah begitu terhad dek kerana hujan lebat.
Sabtu 3 Mac, kami bertiga ke kolej untuk mendaftar anak. Makan ABC di Seksyen 2 dan membeli barang keperluan untuk beribadat di PKNS. Balik ke K. Lumpur dengan bas dan LRT. Petang Sabtu, sempat melaram di Pasar Sabtu Jalan Tunku Abdul Rahman, membeli makanan yang enak-enak.
4 Mac, beli baju batik dan seluar sukan. Beli baju T untuk rakan sepejabat. Jam 4.00 petang, adik bertolak ke Shah Alam.
5 Mac sempat bermalam di Bukit Bintang. Kami berdua berangkat balik pada jam 12 tengah hari, 6 Mac 2012. Kalau masa pergi dengan 2 beg tetapi balik dengan 4 beg. Nasib baik hanya 29.8 kilo sedikit lagi mencapai 30 kilo.
