Karya kreatif asli dicipta pada 14 Januari 2009

Barumbun api pakai calana
Cuik ramuk banyak pacahnya
Riput matanya si anak cina
Sampai bartamu kirai matanya

Pangalaban buahnya labat
Palau mata malangui ka atas
Ampai-ampai kanalah ambat
Ratas dahi ampirkan tatas

Rabus kapayang dalam pariuk
Masak ulam di dalam cerek
Lauk bangas sudah bargiok
Bajurit najis jika takirit

Anak kambing putut ekongnya
Kabat pintu takut pancuri
Capi-capi banar olahnya
Bakunyanyang sapanjang hari

Bangun siang bartapus mua
Tumpah katupang ka dalam kari
Malu banar merahlah mua
Manyuap makanan tangan kairi

Butir tumbuh di indung batis
Tudung kalas dibuat tabir
Mata mamancar mamakai pantis
Gigi bapancar sanyum tarukir

Gulambir ayam warnanya merah
Ampalus kambang tabarus makan
Kalau baibun salarah-larah
Tartawa basar karayah-kayahan

Rumpun galagah dibuat panjar
Duduk di atas kayu bapanga
Hutang usin boleh ku bayar
Bakulimat sikit ku tunai juga

Jangan muras labih baibun
Batagar sangkuh randam di sungai
Jika tak dapat cara barsantun
Baiktah guna ilmu pamugai

Langit hitam tandakan hujan
Aying suak manitis lacah
Sadap sambal cacah balacan
Ambuyat sabalanga apa diacah

Taburanga tapih di pinggang
Tabalurut kain sampai ka paha
Kipat-kipat karuk dipanggang
Ratah lauk luan tamaha

Tutuh ranting bujak tambaga
Tangan pilai kana pijara
Ulam pawas pucuk pangaga
Rabah kapunan jangantah jara

Kulat kadap nyaman dirabus
Orang babau mambari rawan
Daging buaya ubatnya ampus
Tabung balakang ubatnya sawan