Mari barpantun ( Karya asli dihasilkan tepat pada 31 Disember 2008 (selamat manyambut tahun baru) )

Pajah api boleh diaga
Turun ka sungai ditungap buaya
Angin ribut dapat disangga
Inikan pula hati marana

Anak damit duduknya supan
Somboi-somboi ranik tangkainya
Aying mailir dapat dipampan
Hati yang rindu apa ubatnya

Duduk batarak di dalam hutan
Anak basinting di atas titi
Luka labang-labang dapat dipantan
Bagaimana pula luka di hati

Ada uras masuk di mata
Kajam-kisap si kalimpanan
Jika sungguh bagai dikata
Hantarkan gambang jadi hantaran

Batangkumus kain palikat
Duduk manumbir di ujung jungkar
Ada ati mau mamikat
Ibarat lampuyang inda barakar

Carmin aplor marakkan api
Andayang pinang buat mainan
Sudahtah cangkir kurus malidi
Ruhong-ruhong manangis ujung pantaran

Sungkai puasa mangual baduk
Manunggu pangantin bargual canang
Kapala badagung batis balingkuk
Taguring tajalumpuk kalau ditandang

Balingkarung makan kalupis
Makan kalupis basapak gulaian
Jangan diharap malintangnya kumis
Bajumpa kalindahau katungkal-tungkalan

Burung kanawai batapok di ranting
Batang kandis dibuat unun
Anak orang jika disunting
Kana sadia manjadi ulun

Kapala disintak ubat mujarab
Karijat-karijat badan manahan
Oranag bujang apa diharap
Jika kaya barangan-angan

Kapanasan barkiap-kiap
Kiap dibuat biut sabalah
Sulap dibuat bilakan siap
Malar barcarita salarah-larah

Luka di batis manganyat-nganyat
Sintakbabut pamarang di tangkin
Jika barangan sapanjang hayat
Sampai kiamat pun jatuh miskin

Siang –malam manjamur kubal
Nasi bangas dibuat sagun
Bagaimana indakan babal
Amun balajar indatah tagun

Sabarakas ranting kandis dahan
Luka badarah suar-suar
Dari abak-abak hati manahan
Aku sanggup manunggu di luar