PANTUN NASIHAT (Brunei Benoni)

Kapayas banyak gatahnya
Akar bahar tabal rumpunnya
Anak damit banyak olahnya
Sabar mangajar baik jadinya

Kulintangan dipalu-palu
Mangalai-ngalai di siang ari
Miskin kalandar apa dimalu
Asalkan hidup inda mancuri

Asam bambangan dicampur kandis
Lauk pusu tarapung-apung
Hati baik mulut pun manis
Jadi sabutan orang sakampung

Sumboi-somboi tumbuh manjalar
Batang anau dibuat titi
Nahas bala jangan diunjar
Buat pahala beribu kati

Tudung gadung barbunga renda
Sira tawar dituang cuka
Muka lawa parangai bida
Ka sana ka mari orang nda suka

Jangan dilumak tanah yang licak
Amun dilumak kamah batisnya
Anak damit jangan maracak
Amun maracak tulah jadinya

Batangkumus dalam salimut
Batang panyapu dikuis-kuis
Jangan kita jadi pangalimut
Dosa di dunia bilakan abis

Parimpan disusun-susun
Disusun dalam guringsing suasa
Dosa batah boleh diampun
Taubat nasuha sapanjang masa

Pamarang sisip di tangkin
Pisau balati pangalis kumis
Sudah sadar dirimu miskin
Jangan baulah samacam iblis

Sira masin tuang di cangkir
Ayam mangaram di karatahan
Kalau mangaji jangantah mangkir
Masa hadapan jadi taruhan

Anak damit rambutnya bugal
Hitam muanya takana arang
Anak damit jangan matingal
Jika matingal dibanci orang

Tanah licak jangan dilumak
Kalau dilumak kamah batisnya
Anak damit jangantah tamak
Tarlabih tamak buruk padahnya