Pantun terbaru 06 Disember 2011

Tangjipun sanang disiut

Kain renda baripul-ripul

Mangadap palanggan mulutnya biut

Nanti kuampas kayu ampul

Asal laru dibuat tapai

Dari tapai dibuat lihing

Kalau makanan manyangkut diajai

Orang malihat inda ambil pusing

Bangkawat taruk  warnanya

Warna gandula di tangah-tangahnya

Mun malihat kirai matanya

Ku bubut sampai ka rumahnya

Amun ku sigung patah rusuknya

Amun ku sauk lasak dagungnya

Amun rindu arik namanya

Amun marah pandamkan saja

Tarah pasagi manjadi tatal

Kayu babiding dibuang jauh

Kalau tidur inda babantal

Alamat kuburan inda lagi jauh

Pakai baju bataris-taris

Bagalugut aiying di tajau

Kalau mau jualan laris

Jangan diunjar orang yang jagau

Pandidik kaluar api

Dari api manjadi bara

Sudah puas ku jampi-jampi

Orang dijampi jauh di sana

Kudut buntar lawa usulnya
Candasan diapit kaluar suasa

Orang pingkul igal-igal jalannya

Orang miang tagasa-gasa

Main bola babintih-bintih

Takuladas kapala tuhutnya

Panglima gagah rajin balatih

Kalau malas apa untungnya

Pakai baju tangan bartampung

Usin saringgit usin bacurai

Sudah lama hidup sakampung

Rasa tidak mahu barcarai

Singsing tangan malastik Suit

Suit inggap di ujung lampung

Apa indahnya orang yang karit

Tingak-tingak di ujung tanjung

Burung acang patah sayapnya

Disambar oleh burung balatuk

Jika pintar apa tandanya

Jika babal kapala dikatuk

Tabun-tabun asap ditinda

Marabus ubi tangkal isinya

Sudah ku tahu mua bida

Mamajal jua mangurat anaknya

Anak damit gigi basulai

Nampak takidum manis bibirnya

Mulih ka rumah mamakan salai

Abis salai ambuyat disuapnya

Pucuk pauh dibuat sambal

Sarusup daun barcabang

Jika aku manjadi kapal

Lama sudah aku tarabang

Asam kalumbi jamur di tiang

Tiang lurus inda babuku

Mata radam leher jinjang

Inda manyasal jadi manantu

Batah sudah tidak mengarang pantun. Setelah berjumpa dengan kenalan lama, Ag Rajudin, mula dapat idea dan terhasillah 16 rangkap pantun di atas sebagai pemanas minda.

Terima kasih